Um SFR

Skrifstofa SFR er opin virka daga frá kl. 9-16.30, nema föstudaga til kl. 16.
Sumaropnunartími er alla virka daga frá kl. 9-16.  

SFR er stéttarfélag í almannaþjónustu og er félagssvæði þess allt landið. Félagið skiptist í tvo hluta, opinberan hluta og almennan hluta.

• Til opinbera hlutans teljast:
  • einstaklingar í þjónustu ríkisins sem ekki eiga aðild að öðru stéttarfélagi,
  • stéttarfélög starfsmanna, og teljast þá allir meðlimir viðkomandi stéttarfélags félagsmenn SFR, enda eigi félagið aðild að SFR,
  • einstaklingar í vinnu hjá sjálfseignarstofnunum sem starfa í almannaþágu samkvæmt lögum.
• Til almenna hlutans teljast einstaklingar sem vinna hjá fyrirtækjum sem starfa í almannaþágu og voru áður ríkis- eða sjálfseignarstofnanir.

SFR var stofnað 17. nóvember 1939. Stofnfélagar voru 142, en félagsmenn eru nú um 7.700. Í fyrstu voru félagsmenn einkum karlar í skrifstofustörfum sem flestir bjuggu á höfuðborgarsvæðinu. Nú koma félagsmenn úr mörgum starfsgreinum, með afar fjölbreytta menntun og ólíkan bakgrunn, og er nú svo komið að konur eru í miklum meirihluta (70% félagsmanna þann 23. júlí 2004).

Frá upphafi hefur helsta verkefni SFR verið að berjast fyrir bættum kjörum og atvinnuöryggi félagsmanna. Á sama tíma hefur baráttan fyrir margs konar réttindamálum einkum farið fram á vettvangi heildarsamtakanna, BSRB.

Samkvæmt lögum SFR verða þeir sem taka laun eftir kjarasamningi þess sjálfkrafa félagsmenn og greiða gjald til þess. Ef viðkomandi vill ekki vera í félaginu getur hann sagt sig úr því, en þarf eftir sem áður að greiða gjald til þess samkvæmt lögum um kjarasamninga opinberra starfsmanna.