Samanburður á SFR, VR, BSRB, BHM og KÍ

Könnunin stofnun ársins er samstarfsverkefni SFR og VR og eins og fram hefur komið tekur könnunin nú til allra starfsmanna ríkisstofnana óháð stéttarfélagsaðild.

Það er mjög áhugavert að bera saman niðurstöður fyrir þessa hópa. Þegar einkunnir SFR og VR eru bornar saman má sjá að félagsmenn í VR eru sem fyrr ánægðari með vinnustað sinn á heildina litið. Mestu munar um ánægju með launakjör en minnst skilur á milli varðandi vinnuskilyrði. Einnig er athyglisvert að heildareinkunn VR hækkar lítillega á milli áranna 2011 og 2010 á meðan heildareinkunn SFR félaga lækkar lítillega á sama tíma og að þrjú síðustu ár hefur munurinn á milli einkunnargjafar VR og SFR félagsmanna aukist VR í vil.

Samanburður á einkunnargjöf eftir heildarsamtökum stéttarfélaga

Annar og ekki síður áhugaverður samanburður er á milli heildarsamtaka stéttarfélaga hjá hinu opinbera. En þar sem könnunin stóð nú öllum starfsmönnum ríkisstofnana til boða þá er í fyrsta sinn hægt að bera saman ánægju starfsmanna sundurgreinda eftir bandalögum stéttarfélaga. Hér í töflunni eru bornar saman einkunnir á þáttum eftir samtökum stéttarfélaga. Félagsmenn í aðildarfélögum KÍ eru almennt ánægðastir með stofnunina sína eins og sjá má í töflunni hér fyrir neðan. Heildareinkunn félagsmanna í aðildarfélögum BSRB er lægst. Félagsmenn í BSRB eru almennt ekki eins ánægðir með stjórnun, launakjör og starfsanda og félagsmenn annarra bandalaga en eru í meðallagi hvað varðar ánægju með vinnuskilyrði, sveigjanleika vinnunnar og sjálfstæði í starfi.