Niðurstöður úr vali á Stofnun ársins 2009

Umferðarstofa og Sýslumaðurinn í Vík eru Stofnanir ársins 2009.

Í hópi minni stofnana fékk Sýslumaðurinn í Vík hæstu einkunn, eða 4,75 í heildareinkunn. Í öðru sæti var Biskupsstofa með 4,55 í heildareinkunn. Í þriðja sæti var svo Skattrannsóknarstjóri ríkisins með 4,53 í heildareinkunn, en embættið bauð öllum starfsmönnum sínum þátttöku, óháð stéttarfélagsaðild.
Í hópi stærri stofnana fékk Umferðarstofa hæstu einkunn, 4,56 í heildareinkunn. Stofnunin bauð öllum starfsmönnum sínum þátttöku, óháð stéttarfélagsaðild. Í öðru sæti var Ríkisskattstjóri með 4,34, í heildareinkunn. Embættið bauð öllum starfsmönnum sínum þátttöku, óháð stéttarfélagsaðild. Í þriðja sæti var Sjálfsbjargarheimilið, sem einnig bauð öllum starfsmönnum þátttöku, með heildareinkunnina 4,29.

Meðaleinkunn allra stofnana sem eru á lista yfir stofnun ársins er 3,91 en einkunnir voru gefnar á bilinu 1-5. Þátttakendur voru spurðir um trúverðugleika stjórnenda, vinnuskilyrði, ímynd, sjálfstæði, sveigjanleika, ánægju með launakjör og fleira. Líkt og í fyrra er stofnunum skipt eftir stærð. Stærð vinnustaða er almennt talin mikilvæg vegna þess að með aukinni stærð getur samhæfing ólíkra þátta í starfseminni orðið flóknari. Einnig nýta stærri vinnustaðir alla jafna formlegri stjórnun og skipulag en minni vinnustaðir. Líkt og í fyrra voru minni stofnanir skilgreindar sem stofnanir með færri starfsmenn en 50 og stærri stofnanir skilgreindar sem stofnanir með 50 eða fleiri starfsmenn. Almennt gildir að minni stofnanir fá hærri útkomu á þáttunum en stærri stofnanirnar. Mestu munar á launakjörum og trúverðugleika stjórnanda, minni stofnunum í hag. Í síðustu könnun var munurinn enn meiri á einkunnum stórra og lítilla stofnana, einkum á þættinum um trúverðugleika
stjórnenda. Breytt orðalag, þar sem spurt er um stjórnendur frekar en yfirstjórn, hefur því dregið úr muninum á stórum og litlum stofnunum, eins og að var stefnt.

Meginniðurstaða úr könnuninni um Stofnun ársins 2009 er að einkunnir hækka á nokkrum þáttum frá síðustu könnun, sérstaklega hækkar einkunn á þættinum „launakjör“. Heildareinkunn allra þátta hækkar úr 3,7 í 3,8. Þar munar mest um hækkun á viðhorfum til launa sem hækkar úr 2,5 í 2,8. Einnig hækkar trúverðugleiki  stjórnenda úr 3,6 í 3,8 og vinnuskilyrði hækka einnig úr 3,6 í 3,8. Einkunn á ímynd hækkar úr 3,7 í 3,8, þrátt fyrir breytingu á þættinum sem hefur smávægileg áhrif til lækkunar. Aðrir þættir standa því sem næst í stað. Þátturinn „sveigjanleiki vinnu“ stendur í stað (3,6) og sjálfstæði í starfi stendur einnig í stað (4,2). Starfsandi lækkar úr 4,2 í 4,1 sem skýrist af breytingum á mælingunni. Ánægja og stolt er mælt í fyrsta skipti og var einkunn þáttarins 4,2.

Nokkur munur er á svörum karla og kvenna. T.d. gefa konur þættinum ánægja og stolt hærri einkunn (4,2) en karlar (4,0). Einnig hafa konur jákvæðari viðhorf til stjórnenda og gefa hærri einkunn á trúverðugleika stjórnenda (3,9) en karlar (3,7). Einnig er nokkur kynjamunur á ímynd stofnunar í sömu átt, en lítill eða enginn munur er á svörum karla og kvenna hvað varðar starfsanda, launakjör, vinnuskilyrði, sveigjanleika og sjálfstæði. Á heildina litið er því kynjamunur í svörum lítill.

Munur er á milli heildareinkunnar eftir atvinnugreinum. Líkt og fyrir ári er „önnur opinber starfsemi og þjónusta“ og „landbúnaður, orkustofnanir og skógrækt“ í tveimur efstu sætunum. Heildareinkunn  hærri stjórnenda“ er mun hærri en „almennra starfsmanna“ og „sérfræðinga og sérhæfðra starfsmanna.“ Munurinn er meiri nú en í síðustu könnun og er heildareinkunn „hærri stjórnenda“ (4,2) mun hærri en „sérfræðinga og sérhæfðra starfsmanna“ (3,7). Ánægja og stolt „hærri stjórnenda“ er einnig mun meiri en annarra starfsmanna. Þetta er í samræmi við aðrar kannanir og fyrri kannanir SFR. Ánægja stjórnenda með launakjör er einnig mun meiri en annarra.

Trúverðugleiki stjórnenda
Einkunn fyrir trúverðugleika stjórnenda hækkar úr 3,6 í 3,8 á milli mælinga. „Hærri stjórnendur“ meta trúverðugleika stjórnenda meiri en aðrir starfsmenn og konur meta trúverðugleika stjórnenda hærri en karlar. Fólk með háskólamenntun metur trúverðugleika stjórnenda hærri og svo er einnig um starfsfólk minni stofnana. Mest er ánægja með stjórnendur í atvinnugreinaflokknum „Önnur opinber starfsemi og þjónusta,“ „Innheimtumenn/almannatryggingar/ lánasjóðir“ og „Verslunar- og sölustörf,“ en minnst í flokknum „löggæsla, dómstólar og fangelsi.“

Starfsandi
Mat á starfsanda lækkar lítillega, úr 4,2 í 4,1. Lækkunin stafar trúlega að öllu leyti af breytingum á mælingunni, en fjórar spurningar mátu starfsanda nú í stað þriggja áður. „Hærri stjórnendur“ meta starfsanda betri en aðrir starfsmenn og starfsmenn í minni stofnunum meta starfsandann betri en starfsmenn stærri
stofnana.

Launakjör
Einkunn á launakjörum hækkar verulega eða úr 2,5 í 2,8. Ánægja með launakjör er meiri meðal „hærri stjórnenda“ en annarra. Hún er meiri meðal fólks með háskólapróf og meiri í minni stofnunum en stærri. Mest er ánægja mað laun í hópi stofnana í flokknum „Landbúnaður, orkustofnanir og skógrækt“ en minnst í flokknum „Löggæsla, dómstólar og fangelsi.“

Vinnuskilyrði
Einkunn á vinnuskilyrðum hækkar úr 3,6 í 3,8. Matið er jákvæðara á meðal „hærri stjórnenda“ en annarra starfsmanna og jákvæðara meðal starfsfólks í minni stofnunum en stærri stofnunum. Mest er ánægja með vinnuskilyrði í flokknum „Önnur opinber starfsemi og þjónusta“ og „Landbúnaður, orkustofnanir og
skógrækt“ en minnst í flokknum „Löggæsla, dómstólar og fangelsi.“

Sveigjanleiki vinnu
Sveigjanleiki vinnu stendur í stað frá síðustu mælingu. Sveigjanleiki er meiri meðal „hærri stjórnenda“ en annarra starfsmanna og hann er meiri meðal starfsmanna í minni stofnunum en stærri. Mest er ánægja með sveigjanleika í atvinnugreinaflokkunum „Önnur opinber starfsemi og þjónusta“ og „Rannsókna- og eftirlitsstofnanir“ en minnst í flokknum „Löggæsla, dómstólar og fangelsi".

Sjálfstæði í starfi  
Sjálfstæði í starfi fær hæstu einkunnina eins og í fyrra, eða 4,2. Sjálfstæði vex með hækkandi aldri og starfsaldri. Sjálfstæði er meira á meðal „hærri stjórnenda“ en annarra starfsmanna og meiri meðal starfsmanna á minni stofnunum en stærri. Mest er ánægja með sjálfstæði í flokkunum „Önnur opinber starfsemi og þjónusta,“ „Verslunar- og sölustörf,“ „Landbúnaður, orkustofnanir og skógrækt,“ og „Heilbrigðis- og félagsþjónusta“ en minnst í flokknum „Löggæsla, dómstólar og fangelsi.“

Ímynd
Mat á ímynd hækkar frá 3,7 í 3,8, þrátt fyrir breytingar á mælingunni sem kemur til lækkunar á þættinum. „Hærri stjórnendur“ meta ímyndina sem jákvæðari en aðrir starfsmenn og konur meta ímyndina jákvæðari
en karlar. Mat á ímynd hækkar með aldri og er jákvæðari í minni stofnunum en stærri.

Ánægja og stolt
Ánægja og stolt er nýr þáttur. Hann mælist hár í samanburði við aðra þætti og er einkunnin á þættinum 4,2. „Hærri stjórnendur“ eru ánægðari og stoltari en aðrir starfsmenn og ánægja og stolt er meira í minni stofnunum en þeim stærri. Meiri ánægja og stolt er á meðal kvenna en karla og meiri ánægja og stolt er á meðal eldri starfsmanna en yngri. Mest er ánægja og stolt í atvinnugreinaflokkunum „Önnur opinber starfsemi og þjónusta,“
„Verslunar- og sölustörf,“ „Landbúnaður, orkustofnanir og skógrækt,“ og „Innh.menn/ almannatryggingar og lánasjóðir“ en minnst í flokknum „Löggæsla, dómstólar og fangelsi.“