Framkvæmdin

Framkvæmd könnunarinnar var í höndum Capacent Gallup eins og síðast liðin ár. Í desember 2008 fengu forstöðumenn ríkisstofnana, sjálfseignarstofnana og fyrirtækja þar sem SFR félagar vinna, sent kynningarbréf þar sem ítarlega var fjallað um könnunina og framkvæmd hennar. Sérstaklega var fjallað um hvernig stofnanir bæru sig að ef þær vildu að allir starfsmenn, óháð stéttarfélögum, tækju þátt. Félagsmenn voru einnig hvattir til að nota tækifærið og taka þátt í könnuninni í SFR blaðinu og á neti SFR.
Framkvæmdin var með þeim hætti að hringt var í félagsmenn SFR og þeim boðið að taka þátt í könnuninni á netinu eða í hefðbundnum pósti. Ef ekki náðist í viðkomandi var honum sendur listi í hefðbundnum pósti, en þeir sem ekki vildu taka þátt fengu ekki senda könnun.
Eins og áður sagði var þeim stofnunum, sjálfseignarstofnunum og fyrirtækjum þar sem félagsmenn SFR starfa, gefinn kostur á að bjóða öllu starfsfólki sínu þátttöku, óháð stéttarfélagsaðild. 27 stofnanir, sjálfseignarstofnanir og fyrirtæki nýttu sér það. Spurningalistar voru svo sendir út í byrjun febrúar. Sendir voru út ríflega 6.500 spurningalistar, bæði rafrænt og með pósti, og skiluðu tæplega 3.800 starfsmenn inn svörum. Nokkrir listar voru ekki fylltir út á fullnægjandi hátt, þannig að alls voru tæplega 3.500 listar notaðir við úrvinnsluna. Svarhlutfall var 57%, en var 58% í fyrra.

Tilgangur
Tilgangur könnunarinnar „Stofnun ársins“ er nú líkt og fyrri ár að gera stjórnendum kleift að vinna markvisst að úrbótum þar sem þeirra er þörf og veita stjórnendum aðhald til hagsbóta fyrir starfsfólk. Aldrei hefur verið mikilvægara að gera könnunina um Stofnun ársins en nú. Mikil óvissa ríkir á vinnumarkaði og fyrirsjáanlegt að næstu mánuðir og misseri verði launafólki og stofnunum erfið. Stjórnendur hafa þurft og munu þurfa að taka erfiðar ákvarðanir á næstu mánuðum og mikilvægt að þær ákvarðanir séu teknar af yfirvegun og byggðar á vandaðri stjórnsýslu, en aldrei reynir meira á hæfni stjórnenda en á erfiðum tímum.
Sá veruleiki sem við búum við í dag er vaxandi krafa um skilvirkni en jafnframt virðist eiga að halda uppi óbreyttu þjónustustigi. Þessi staða gerir miklar kröfur til bæði stjórnenda og starfmanna. Þrátt fyrir erfiðar aðstæður er það hins vegar réttmæt krafa að aðstæður, stjórnun og skipulag miðist við þær kröfur sem til stofnananna og starfsmanna þeirra eru gerðar. Mikilvægt er, bæði fyrir starfsmenn og þjónustuþega, að stjórnendur reyni að búa starfsmönnum sínum jákvætt og styðjandi umhverfi nú þegar verkefnin eru svo gríðarleg sem við stöndum frammi fyrir.
Almennt gildir að samræmi verður að vera á milli aukinna krafna um árangur stofnana og þeirra starfsskilyrða sem starfsmönnum eru búin. Mælingar á frammistöðu stofnana á þessu sviði eru ekki bara sjálfsagðar heldur nauðsynlegar. Með þessu móti fá starfsmenn og stjórnendur kærkomnar upplýsingar til að meta frammistöðu sinnar stofnunar.
Niðurstöðurnar geta starfsmenn því notað til að meta eigin vinnustað í samanburði við aðrar stofnanir og fyrirtæki, bæði á opinberum og almennum vinnumarkaði. En eins og áður er getið eru þessar upplýsingar ekki síður dýrmætar fyrir stjórnendur, hvort sem um er að ræða staðfestingu á því sem vel er gert í starfsmannamálum eða hvatning til að gera betur.

Átta þættir mældir
Þættirnir sem mældir voru nú eru átta talsins: Trúverðugleiki stjórnenda, starfsandi, launakjör,
vinnuskilyrði, sveigjanleiki vinnu, sjálfstæði í starfi, ímynd stofnunar og ánægja og stolt.
Þættirnir átta eru samsettir úr þeim spurningum sem falla undir hvern þátt. Hverri spurningu er hægt að svara á fimm punkta kvarða (1-5) þar sem hærri endi kvarðans gefur til kynna mikla ánægju með það sem spurt er um en lægri endinn gefur til kynna mikla óánægju.
Valið á Stofnun ársins 2009 byggist á heildareinkunn sem er samsett úr framangreindum átta þáttum. Í samsetningu heildareinkunnar er vægi þáttanna átta ólíkt og er vægi þáttarins „trúverðugleiki stjórnenda“ mest í heildareinkunn (29%), en minnst er vægi launakjara og sveigjanleika vinnu (7%). Vægi einstakra þátta í heildareinkunn byggir á því hve stórt hlutfall dreifingarinnar hver þáttur skýrir af dreifingu allra spurninga. Tölfræðileg greining leiddi í ljós að spurningarnar áttu vel heima í viðeigandi þætti.

Breytingar á þáttum milli ára
Nokkrar smávægilegar breytingar voru gerðar á mælikvörðunum frá því á síðasta ári. Mæling á trúverðugleika stjórnenda breyttist lítillega. Orðalagi á spurningum um stjórnendur var breytt og var nú spurt um „stjórnendur“ en áður var spurt um „yfirstjórn.“ Spurningar um næsta yfirmann miðuðust áfram við næsta yfirmann. Spurningin um hvort næsti yfirmaður hjálpaði við að bæta frammistöðu starfsmanns var breytt og var nú spurt um hvort hægt væri að leita til næsta yfirmanns ef á þyrfti að halda. Einkunn á þessari spurningu var 4,4. Ein spurning bættist við þáttinn, það er spurningin „Ég hafði tækifæri til að læra og þróast í starfi á sl. 12 mánuðum.“ Meðaleinkunn þeirrar spurningar var 3,9. Þessar breytingar hafa minniháttar áhrif til hækkunar á meðaltali þáttarins.
Mæling á stolti og ímynd breyttist og var spurningin um stolt tekin úr mælingunni og einskorðast nú mat á ímynd alfarið við spurningar um ímynd. Þetta veldur lítillegri lækkun á ímyndarþættinum. Nýr þáttur kom inn sem sneri að ánægju starfsmanna og færðist spurningin um stolt af stofnun yfir í hinn nýja þátt. Ein spurning bættist við mælingu um starfsanda og var það spurningin um ánægju með vinnustaðamenningu. Þessi spurning hefur áhrif til lækkunar um 0,1.