Nokkrar athyglisverðar spurningar og svör

Að vanda er fróðlegt er að skoða svör við einstökum spurningum könnunarinnar. Hér eru nokkur dæmi um athyglisverðar niðurstöður.

Stjórnendur stofnunarinnar virða starfsfólkið mikils
Rúmlega 60% aðspurðra eru mjög og frekar sammála þessari fullyrðingu og segja stjórnendur stofnunarinnar virða starfsfólkið mikils. Þetta er nokkur aukning frá því í fyrra en þá voru 50,2% mjög og frekar sammála. Þróunina skal þó túlka með fyrirvara því í fyrra var spurt um yfirstjórn stofnunar en nú um stjórnendur. Staða innan stofnunar hefur áhrif á svörun og um 85% hærri stjórnenda eru sammála fullyrðingunni á móti um 59% almennra og sérhæfðra starfsmanna. Einnig hefur atvinnugrein áhrif og á meðan einungis 43,4% starfsmanna í löggæslu/ dómstólum/fangelsum eru mjög eða frekar sammála fullyrðingunni er hlutfall þeirra sem eru mjög og frekar sammála því að stjórnendur virði starfsfólk mikils 76,1% hjá starfsmönnum í flokkinum Önnur opinber starfssemi og þjónusta og 66,6% hjá starfsmönnum innheimtust/almannatr. og lánasj. Þá telja um 81% starfsmanna næsta yfirmann vera mjög eða frekar sanngjarnan við starfsfólk og er það aukning frá í fyrra þegar um 75% voru á sömu skoðum.

Sveigjanleiki vinnu
Um 42% starfsmanna svara því að vinnutími þeirra geti oftast eða alltaf verið sveigjanlegur sem er svipað og í fyrra. Jafnmargir eða 42% segja vinnutíma ekki sveigjanlegan. Einnig var spurt hvort starfsmenn hefðu svigrúm til að útrétta í vinnutímanum þegar nauðsyn krefði og 75% starfsmanna töldu sig oftast eða alltaf hafa það svigrúm. Eins og í fyrra er starfsfólk í löggæslu/ dómstólum/fangelsum óánægðast með sveigjanleika í starfi.

Ánægja með launakjör
Nokkur breyting hefur orðið á svörun við þessari spurningu frá því í fyrra. Árið 2008 sögðust tæplega 60% svarenda vera mjög eða frekar óánægðir með launakjör sín. Nú segjast 42% svarenda vera óánægðir með launakjör sín og er það þónokkur munur frá því í fyrra. Að sama skapi segjast nú 30,5% vera frekar og mjög ánægðir með launakjör sín á móti 21% í fyrra. Hvort þetta bendi til þess að starfsmenn telji að launakjör sín hafi almennt batnað eða hvort launakjör hafi einfaldlega minna vægi nú en í fyrra skal ósagt látið. 
Starfsfólk sem vinnur við Landbúnaðar eða orkustofnanir sker sig þó úr en 60% þeirra eru mjög og frekar ánægðir með launakjörin og einnig eru stjórnendur og starfsmenn með háskólamenntun líklegri en aðrir starfsmenn til að vera ánægðir með launakjör sín.

Ánægja og vellíðan í starfi
Langflestir eða tæp 87% segjast mjög eða frekar ánægðir í starfi sínu og er það aukning frá í fyrra þegar 83% aðspurðra sögðust mjög eða frekar ánægðir í starfi sínu. Heldur fleiri konur eru ánægðar með starf sitt en karlar og eins eru starfsmenn minni stofnana heldur ánægðari en starfsmenn þeirra stærri.
Þá segja langflestir eða 88,5% að þeim líði frekar eða mjög vel í starfi sínu og er það einnig aukning frá því í fyrra.  Meirihluti svarenda (74,7%) er jafnframt stoltur af stofnuninni sem þeir starfa hjá og er það hlutfall óbreytt á milli ára.