Niðurstöður

Heildareinkunn í Stofnun ársins 2008 er 3,67 stig. 5599 listar voru sendir út og bárust 3256 fullnægjandi svör og því var svarhlutfall 58% . Til þess að vera með í greiningunni stofnun ársins þurfti svarhlutfall stofnunar að vera 35%. Auk þess þurftu fjögur eða fleiri svör að berast frá minni stofnunum.  97 stofnanir uppfylltu þessi skilyrði og frá þeim bárust 2572 svör. Meðalheildareinkunn þeirra stofnana sem eru á lista yfir stofnun ársins er 3,80 en einkunnir eru gefnar á bilinu 1-5. Þátttakendur voru spurðir um trúverðugleika stjórnenda, vinnuskilyrði, ímynd og stolt af vinnustaðnum, starfsanda, ánægju með launakjör og fleira.

Í hópi minni stofnana fékk Skattrannsóknarstjóri ríkisins 4,64 í heildareinkunn, en embættið bauð öllum starfsmönnum sínum þátttöku, óháð stéttarfélagsaðild. Í öðru sæti var Sýslumaðurinn í Vík með 4,61 og í þriðja sæti Skattstofa Austurlands með 4,44 í heildareinkunn.  Í hópi stærri stofnana var Ríkisskattstjóri með 4,28 í heildareinkunn, en þar var einnig öllum starfsmönnum boðið að taka þátt. Í öðru sæti var Umferðarstofa með 4,21 og í þriðja sæti Sjálfsbjargarheimilið með 4,11 í heildareinkunn. Báðar þessar stofnanir buðu öllum starfsmönnum þátttöku. 

Heildareinkunn í Stofnun ársins er 3,67. Af lykilþáttunum sjö koma sjálfstæði í starfi og starfsandi best út, líkt og í fyrra. Lægstu meðaleinkunnina fá hins vegar launakjör og munar talsverðu á einkunn þess þáttar og þeim sem næst kemur.

Sjálfstæði í starfi
Sjálfstæði í starfi fær hæstu meðaleinkunnina, eða 4,18, af lykilþáttunum sjö á meðal þátttakenda könnunarinnar. Almennt upplifa konur meira sjálfstæði í starfi en karlar og er marktækur munur þar á. Hærri stjórnendur og millistjórnendur telja sig njóta meiri sjálfstæðis í starfi en sérfræðingar, sérhæft starfsfólk og almennir starfsmenn. Þeir sem hafa lengri starfsaldur gefa sjálfstæði í starfi jafnframt hærri einkunn en þeir sem hafa styttri starfsaldur. Eins og í fyrra upplifir starfsfólk í löggæslu, hjá dómstólum og í fangelsum, marktækt minna sjálfstæði í starfi en starfsfólk annarra atvinnugreina.

Starfsandi
Starfsandi skorar hátt á meðal þátttakenda könnunarinnar en sá þáttur fær aðra hæstu meðaleinkunnina, næst á eftir sjálfstæði í starfi. Hærri stjórnendur og millistjórnendur gefa starfsanda að meðaltali hærri einkunn en almennir starfsmenn. Ekki reyndist marktækur munur eftir menntun og kyni.

Stolt af stofnun
Einkunn fyrir þáttinn stolt af stofnun er 3,72. Eins og í fyrra er starfsfólk mennta- og menningarstofnana stoltast af þeirri stofnun sem það vinnur hjá, en minnst er stolt af stofnun á meðal þeirra sem vinna í löggæslu, hjá dómstólum og í fangelsum. Athygli vekur að sérfræðingar og sérhæft starfsfólk gefur þessum þætti almennt lægri einkunn en aðrir.

Vinnuskilyrði
Meðaleinkunn fyrir vinnuskilyrði er 3,63 og hefur lítið breyst frá því í fyrra. Ekki var marktækur munur eftir kyni né heldur menntun. Hærri stjórnendur og millistjórnendur telja vinnuskilyrði betri en sérfræðingar, sérhæft starfsfólk og almennir starfsmenn. Vinnuskilyrði fá líkt og í fyrra áberandi lægstu einkunn hjá starfsfólki í löggæslu, hjá dómstólum og í fangelsum, en hæstu einkunn hjá starfsfólki í annarri opinberri starfsemi og þjónustu og í landbúnaði, skógrækt og hjá orkustofnunum.

Trúverðugleiki stjórnenda
Meðaleinkunn fyrir trúverðugleika stjórnenda er 3,61 en trúverðugleiki stjórnenda er sá þáttur sem fær næstlægstu meðaleinkunnina af lykilþáttunum sjö. Viðhorf til trúverðugleika stjórnenda er mismunandi eftir hópum, en marktækur munur mældist eftir kyni, menntun, starfsaldri, stöðu og atvinnugrein. Þeir sem hafa stystan starfsaldur gefa trúverðugleika stjórnenda hærri einkunn en þeir sem hafa lengri starfsaldur. Fólk í efsta stjórnendalaginu og með mestu menntunina metur trúverðugleika stjórnenda hærri að meðaltali en aðrir. Trúverðugleiki stjórnenda er mestur í annarri opinberri starfsemi og þjónustu annars vegar og í landbúnaði, skógrækt og hjá orkustofnunum hins vegar, en minnstur í löggæslu, fangelsum og hjá dómstólum.

Sveigjanleiki í vinnu
Sveigjanleiki í vinnu skorar í meðallagi hátt eða 3,60 á meðal þátttakenda könnunarinnar. Marktækur munur er á kynjum og meta konur sveigjanleika almennt hærra en karlar. Það kemur ekki á óvart að hærri stjórnendur og millistjórnendur telja sig njóta meiri sveigjanleika í starfi en sérfræðingar og almennt starfsfólk. Sem fyrr sker starfsfólk í löggæslu, hjá dómstólum og í fangelsum sig nokkuð úr og er að meðaltali með lægstu einkunnina á þessum þætti. Starfsfólk í annarri opinberri starfsemi og þjónustu og í landbúnaði, skógrækt og hjá orkustofnunum,metur sveigjanleika að meðaltali hæst.

Launakjör
Ekki er marktækur munur á afstöðu kynjanna til launa. Þeir sem hafa lokið háskólaprófi eru sáttari við sín launakjör en þeir sem eru með minni menntun. Ánægja með launakjör eykst einnig eftir ábyrgð en hærri stjórnendur og millistjórnendur eru ánægðastir með þennan þátt. Starfsfólki í annarri opinberri starfsemi og þjónustu og starfsfólk í landbúnaði, skógrækt og hjá orkustofnunum, er sáttast við sín launakjör. Óánægja með launakjör er hins vegar mest á meðal starfsfólks í löggæslu, fangelsum og hjá dómstólum.

Kynjamunur
Mestur munur á körlum og konum kemur fram í þættinum sveigjanleiki. Konur gefa sveigjanleika í vinnu að  meðaltali hærri einkunn en karlar sem er breyting frá því 2007 en þá var því öfugt farið. Konur meta trúverðugleika stjórnenda einnig hærra en karlar sem og sjálfstæði í starfi. Marktækur munur á kynjum kom ekki fram á öðrum þáttum.

Munur á milli atvinnugreina
Á töflunni hér á eftir má sjá heildareinkunn eftir atvinnugrein. Eins og í fyrra er önnur opinber starfsemi og þjónusta og landbúnaður, skógrækt og orkustofnanir, í efstu tveimur sætunum.

Önnur opinber starfsemi og þjónusta  -  3,99
Landbúnaður, orkustofnanir og skógrækt  -  3,91
Innheimtumenn ríkissjóðs, almannatryggingar og lánasjóðir  -  3,80
Mennta- og menningarstofnanir  -  3,71
Verslunar - og sölustörf -   3,68
Rannsókna- og eftirlitsstofnanir  -  3,66
Heilbrigðis- og félagsþjónusta  -  3,58
Löggæsla, dómstólar og fangelsi  -  3,29

Stærri og minni stofnanir
Eins og í fyrra er meðaleinkunn á öllum þáttunum 7 hærri meðal starfsfólks í minni stofnunum (færri en 50 starfsmenn). Mesti munurinn kemur fram varðandi ánægju með launakjör og trúverðugleika stjórnenda. Hæstu einkunnirnar á þáttunum Sú stofnun sem er með hæstu einkunnina á tilteknum þætti fær 99 stig af 100 mögulegum. Þannig er Sýslumaðurinn í Vík með hæstu einkunnina í 5 þáttum af 7, eða þáttunum trúverðugleiki stjórnenda, vinnuskilyrði, sjálfstæði í starfi, ímynd og stolt og starfsandi. Skattrannsóknarstjóri ríkisins er með hæstu einkunnina í þættinum launakjör og Búnaðarsamtök Vesturlands með hæstu einkunnina í þættinum sveigjanleiki í vinnu.