Helstu niðurstöður
Það er afar fróðlegt að rýna í niðurstöður könnunarinnar og margt forvitnilegt sem kemur í ljós. Hér eru nokkur atriði sem vöktu athygli okkar.
Heildareinkunn í Stofnun ársins er 3,64. Þeir þættir sem koma best út eru sjálfstæði í starfi annars vegar og starfsandi hins vegar. Launakjör fá lægstu meðaleinkunnina af lykilþáttunum átta og munar töluverðu á einkunn þess þáttar og þeim sem næstur kemur.
| Lykilþættirnir |
2007 |
2006 |
| Heildareinkunn |
3,64 |
3,78 |
| Sjálfstæði í starfi |
4,15 |
4,19 |
| Starfsandi |
4,11 |
4,18 |
| Álag og kröfur* |
3,92 |
4,07 |
| Stolt af stofnun |
3,68 |
3,84 |
| Vinnuskilyrði |
3,62 |
3,82 |
| Trúverðugleiki stjórnenda |
3,54 |
3,69 |
| Sveigjanleiki í vinnu |
3,22 |
3,36 |
| Launakjör |
2,52 |
2,72 |
mun viðráðanlegra er vinnuálagið að mati þátttakenda.
Launakjör
Skoðanir á launakjörum eru ólíkar milli hópa. Karlar eru sáttari við sín laun en konur og er munur á kynjunum marktækur. Menntun og staða innan stofnunar skiptir líka máli og virðist ánægjan aukast eftir því sem ofar dregur í skipuritinu, en hærri stjórnendur og millistjórnendur eru ánægðastir með launakjör sín. Það er líka áberandi munur milli atvinnugreina þar sem starfsfólk í heilbrigðis- og félagsþjónustu og löggæslu, dómstólum og fangelsum er óánægðast með launakjörin. Ánægja með launakjör er mest í landbúnaði, skógrækt og hjá orkustofnunum annars vegar og annarri opinberri starfsemi og þjónustu hins vegar.
Trúverðugleiki stjórnenda
Starfsaldur,menntun, staða og atvinnugrein stofnunar virðist skipta máli þegar trúverðugleiki trúverðugleiki stjórnenda er skoðaður en ekki kemur fram munur eftir kyni á þessum þætti. Þeir sem hafa stystan starfsaldur (2 ár eða minna) meta trúverðugleika stofnunarinnar hærri að jafnaði en þeir sem hafa lengri starfsaldur en 4 ár. Fólk í efsta stjórnendalaginu og með mestu menntunina gefur trúverðugleika stjórnenda hærri einkunn að meðaltali en aðrir. Trúverðugleiki stjórnenda er mestur í landbúnaði, skógrækt og hjá orkustofnunum en minnstur í löggæslu, fangelsum og hjá dómstólum.
Vinnuskilyrði
Meðaleinkunn fyrir vinnuskilyrði er á heildina í meðallagi há, eða 3,62. Karlar gefa vinnuskilyrðum að meðaltali hærri einkunn en konur. Þá er áhugavert að sjá að starfsfólk með lengstan starfsaldur (lengri en 15 ár) gefur vinnuskilyrðum að meðaltali hærri einkunn en starfsfólk sem hefur unnið 15 ár eða skemur. Meðaleinkunn fyrir vinnuskilyrði er einnig hærri meðal hærri stjórnenda og millistjórnenda en annarra starfsmanna.Töluverður munur er á mati starfsfólks á vinnuskilyrðum eftir því í hvaða atvinnugrein það starfar. Vinnuskilyrði fá langlægsta einkunn hjá starfsfólki í löggæslu, dómstólum og fangelsum en hæsta einkunn í landbúnaði, skógrækt og hjá orkustofnunum.
Sveigjanleiki
Karlar gefa sveigjanleika hærri einkunn að meðaltali en konur.Mjög mikill munur kemur fram eftir menntun á þessum þætti en starfsfólk með háskólamenntun gefur sveigjanleika mun hærri einkunn að meðaltali en aðrir. Þá er meðaleinkunn fyrir sveigjanleika hærri meðal stjórnenda og millistjórnenda samanborið við sérfræðinga og almenna starfsmenn. Mikill munur er einnig á sveigjanleika eftir atvinnugreinum og er það eins og með mat á vinnuskilyrðum að starfsfólk í landbúnaði, skógrækt og hjá orkustofnunum gefur sveigjanleika hæstu einkunnina en þeir sem starfa í löggæslu, hjá dómstólum og í fangelsum lægstu einkunnina.
Sjálfstæði í starfi
Sjálfstæði í starfi skorar hátt hjá þátttakendum könnunarinnar. Ekki kemur á óvart að sjálfstæði í starfi eykst með hækkandi starfsaldri, en það vekur athygli að einkunnin er svipuð milli menntunarhópa og virðist ekki aukast með meiri menntun. Þá kemur ekki á óvart að hærri stjórnendur og millistjórnendur gefa sjálfstæði í starfi hærri einkunn að meðaltali en sérfræðingar og almennir starfsmenn. Ein atvinnugrein sker sig nokkuð úr með tilliti til sjálfstæðis í starfi en það eru starfsmenn í löggæslu, hjá dómstólum og í fangelsum. Þeir virðast upplifa mun minna sjálfstæði í starfi sínu en starfsfólk annarra atvinnugreina.
Álag og kröfur
Einkunn á þættinum álag og kröfur er að meðaltali hærri hjá konum en körlum. Konur virðast því upplifa að meðaltali minna álag og kröfur í starfi sínu en karlar.Hér er mjög mikill munur eftir atvinnugreinum og er álagið áberandi mest hjá þeim sem starfa við löggæslu, hjá dómstólum og í fangelsum en minnst hjá þeim sem starfa í landbúnaði, skógrækt og hjá orkustofnunum.
Stolt af stofnun
Það er áhugavert að hærri stjórnendur eru að jafnaði stoltari af stofnuninni sem þeir starfa hjá en starfsfólk í öðrum stöðum. Ekki kemur fram munur á þessum þætti eftir kyni eða menntun en töluverður munur er á atvinnugreinum. Starfsfólk mennta- og menningarstofnana er stoltast af þeirri stofnun sem það vinnur hjá en minnst er stolt þeirra sem starfa við löggæslu, hjá dómstólum og í fangelsum.
Starfsandi
Einkunn fyrir starfsanda var á heildina litið góð (4,11). Ekki kom fram munur á starfsanda eftir kyni,menntun eða starfsaldri. Hærri stjórnendur gáfu þessum þætti að meðaltali hærri einkunn en almennir starfsmenn og sérfræðingar. Eins og á öðrum þáttum er heldur minni ánægja með starfsanda hjá starfsfólki í löggæslu, hjá dómstólum og í fangelsum heldur en í öðrum atvinnugreinum.
Kynjamunur
Mesti munurinn á körlum og konum kemur fram á þættinum vinnuskilyrði en konur gefa vinnuskilyrðum að meðaltali lægri einkunn en karlar. Konur gefa sveigjanleika í starfi einnig lægri einkunn að meðaltali auk þess sem meðaleinkunn þeirra fyrir launakjör er lítið eitt lægri en karlanna. Meðaleinkunn kvenna á þættinum álag og kröfur er aftur á móti hærri en karla sem þýðir að konurnar eru ánægðari en karlarnir með þennan þátt. Þá virðast konurnar vera ánægðari en karlarnir með sjálfstæði sitt í starfi.
Munur milli atvinnugreina
Í töflunni hér á eftir má sjá heildareinkunn eftir atvinnugrein. Þrjú efstu sætin verma landbúnaður, landbúnaður, orkustofnanir og skógrækt, önnur opinber starfsemi og þjónusta og rannsóknar- og eftirlitsstofnanir og eru þessar þrjár atvinnugreinar með marktækt hærri einkunn en sú sem er í fjórða sætinu. Í neðsta sætinu er löggæsla, dómstólar og fangelsi með lægstu heildareinkunnina að meðaltali og er það áberandi að starfsfólk í þessari atvinnugrein gefur öllum þáttum lægri einkunn og virðist því almennt vera óánægðara og undir meira álagi en starfsfólk í öðrum atvinnugreinum.
Landbúnaður, orkustofnanir og skógrækt .................................................3,92
Önnur opinber starfsemi og þjónusta ........................................................3,79
Rannsóknar- og eftirlitsstofnanir ...............................................................3,78
Innheimtumenn ríkissjóðs, almannatryggingar og lánasjóðir ......................3,67
Mennta- og menningarstofnanir..................................................................3,67
Verslunar- og sölustörf .............................................................................3,64
Heilbrigðis- og félagsþjónusta ....................................................................3,54
Löggæsla, dómstólar og fangelsi................................................................3,28
Einkunnir í landbúnaði, orkustofnunum og skógrækt hækka milli ára á 5 þáttum af 8, þ.e. sveigjanleika, vinnuskilyrðum, álagi og kröfum, trúverðugleika stjórnenda og starfsanda. Mest hækkar einkunnin á þættinum sveigjanleika.
Í tveimur atvinnugreinum lækka einkunnir á milli ára á mörgum þáttum. Þ.e. annars vegar í löggæslu, hjá dómstólum og í fangelsum og hins vegar í verslunar - og sölustörfum. Í verslunar- og sölustörfum lækka einkunnir á milli ára á sex þáttum af átta og mest á þáttunum vinnuskilyrði og trúverðugleiki stjórnenda. Í löggæslu, hjá dómstólum og í fangelsum lækkar meðaleinkunn á fimm þáttum af átta og mest á þættinum launakjör.
Stærri og minni stofnanir
Meðaleinkunn á öllum þáttunum átta er hærri meðal starfsfólks í minni stofnunum (færri en 50 starfsmenn) en þeim stærri (50 eða fleiri starfsmenn). Á heildina litið fær sjálfstæði í starfi og starfsandi hæstu einkunnirnar og á það við bæði minni og stærri stofnanir. Launakjör er sá þáttur sem fær lægstu einkunnina að meðaltali í bæði minni og stærri stofnunum en þó eru starfsmenn í minni stofnunum ánægðari með launakjör sín en starfsmenn stærri stofnanna.
Hæstu einkunnirnar á þáttunum
Sú stofnun sem er með hæstu einkunnina á tilteknum þætti fær fullt hús stiga eða raðeinkunnina 100. Þannig er Skattrannsóknarstjóri ríkisins sem er með hæstu heildareinkunnina með raðeinkunnina 100 á þáttunum trúverðugleiki, vinnuskilyrði, sjálfstæði í starfi og álag og kröfur. Biskupsstofa er með hæstu einkunnina á þættinum launakjör, Staðlaráð Íslands er með hæstu einkunnina á þættinum starfsandi, Skrifstofa rannsóknastofnana atvinnuveganna fær hæstu einkunn á þættinum sveigjanleiki í vinnu og starfsmenn SÁÁ eru stoltastir af stofnuninni sem þeir starfa hjá.
Leit
Flýtileiðir í toppi
