Helstu niðurstöður

Glærur frá kynningu Guðbjargar Andreu Jónsdóttur, rannsóknarstjóra Capacent, á fundi trúnaðarmanna 11. september 2007, má nálgast HÉR. 

Heildarskýrslu má nálgast HÉR.

Heildarlaun
Meðalheildarlaun voru rúmar 274 þúsund krónur. Könnunin leiddi í ljós að á meðal fólks í fullu starfi eru konur að jafnaði með tæplega 25% lægri heildarlaun en karlar. Meðalheildargreiðslur karla í 70-100% starfshlutfalli voru rúmar 330 þúsund krónur, en meðalheildargreiðslur kvenna í sama starfshlutfalli rúmar 248 þúsund krónur.

Grunnlaun
Meðalgrunnlaun voru tæpar 222 þúsund krónur. Að jafnaði voru grunnlaun kvenna um 11% lægri en meðalgrunnlaun karla. Meðalgrunnlaun karla í fullu starfi voru rúmlega 239 þúsund krónur en grunnlaun kvenna að meðaltali rétt rúmlega 213 þúsund krónur.

Kynbundinn launamunur
Að teknu tilliti til vinnutíma (fjölda vinnustunda á viku), starfsaldurs, starfsstéttar og menntunar minnkaði kynbundinn munur á heildarlaunum í 14,7% (vikmörk +/- 3,8%). Því er með 95% vissu hægt að segja að á meðal fólks á svipuðum aldri, með sama starfsaldur, í sömu starfsstétt, með sambærilegan vinnutíma og sambærilega menntun séu konur með á bilinu 10,9% til 18,5% lægri heildarlaun en karlar. Aldur hafði ekki tölfræðilega marktæk áhrif heildarlaun.

Þegar búið var að taka út áhrif starfsaldurs, starfsstéttar og menntunar minnkaði kynbundinn munur á grunnlaunum í 4,2% (vikmörk +/- 2,9%). Með öðrum orðum getum við sagt með 95% vissu að raunverulegur munur á grunnlaunum kynjanna sé á bilinu 1,3% til 7,1%. Aldur hafði ekki tölfræðilega marktæk áhrif grunnlaun.

Hæstu og lægstu launin
Meðal félagsmanna SFR eru fjármálastjórar með hæstu heildarlaunin að meðaltali eða 466 þúsund krónur á mánuði. Lægstu heildarlaun mánaðar er að finna meðal skrifstofufólks en heildarmeðallaun móttökuritara eru 199 þúsund krónur á mánuði og hjúkrunarritara 200 þúsund krónur á mánuði. 

Grunn- og heildarlaun fara hækkandi með aukinni menntun. Yngsti aldurshópurinn (yngri en 29 ára) fær lægstu grunn- og heildarlaunin að meðaltali en fólk á aldrinum 40-59 ára þau hæstu.

Þá virðist stærð stofnana einnig skipta máli en meðalgrunn- og heildarlaun stofnana með 500 eða fleiri starfsmenn eru lægri samanborið við stofnanir með 499 eða færri starfsmenn.

Þá kemur fram töluverður launamunur eftir atvinnugrein. Hæstu meðalgrunn – og heildarlaun meðal félagsmanna SFR eru greidd í landbúnaði, hjá orkustofnunum og í skógrækt. Lægstu grunnlaunin að meðaltali eru hjá félagsmönnum SFR sem starfa í heilbrigðis- eða félagsþjónustu. Félagsmenn SFR sem starfa hjá innheimtumönnum ríkissjóðs, almannatryggingum eða lánasjóðum eru með lægstu heildarlaunin að meðaltali.

Langflestir óánægðir með launakjör sín
Aðeins 20% félagsmanna SFR segjast ánægðir með launakjör sín. Tæpur þriðjungur er mjög óánægður með þau. Karlar eru að meðaltali ánægðari með launakjör sín en konur. Félagsmenn SFR sem starfa í landbúnaði, hjá orkustofnunum eða í skógrækt eru ánægðari en félagsmenn sem starfa í öðrum atvinnugreinum með launakjör sín. Félagsmenn SFR sem starfa í heilbrigðis- eða félagsþjónustu og í löggæslu, hjá dómstólum eða í fangelsum eru óánægðastir.  

Munur á raunverulegum og sanngjörnum heildarlaunum að mati starfsmanna
Munurinn á raunverulegum heildarlaunum og launum sem starfsmenn telja sanngjarnt að þeir fái fyrir sína vinnu er 29%. Mjög litlu munar á körlum og konum hvað þetta varðar. Þ.e. konur og karlar telja að laun þeirra ættu að vera 29% hærri til að teljast sanngjörn. Karlar telja að 406 þúsund krónur að meðaltali séu þau heildarlaun sem væru sanngjörn fyrir þeirra vinnu en konur telja að 309 þúsund krónur væru sanngjörn heildarlaun að meðaltali fyrir vinnu þeirra. Sanngjörn heildarlaun að mati karla eru þannig  um 31% hærri en þau laun sem konur telja að séu sanngjörn.  

Vinnutími/fjarvinna
Vinnuvika félagsmanna SFR er að meðaltali 44 klst. Karlar vinna að meðaltali 47 klst á viku en konur 42 klst. Um 12% félagsmanna SFR vinna fjarvinnu og vinna þeir að meðaltali 11 klukkustundir í fjarvinnu á viku. Karlar eru mun líklegri en konur til að vinna fjarvinnu en 20% þeirra segist gera það samanborið við 8% kvenna. Einnig kemur fram töluverður munur eftir aldri en fólk á aldrinum 30 til 39 ára er líklegast til að vinna fjarvinnu eða 18%. 

Fyrirkomulag launagreiðslna
Flestir fá greidd grunnlaun með aukagreiðslum eða 74% en 16% fá greidd grunnlaun án allra aukagreiðslna. Þar kemur fram töluverður munur eftir kyni en fimmtungur kvenna er með grunnlaun án allra aukagreiðslna samanborið við einungis 6% karla.

Aukagreiðslur
Aukagreiðslur innifaldar í heildarlaunum eru greiddar til um 85% félagsmanna SFR. Algengast er að þar sé um að ræða vaktaálag en það er innifalið í heildarlaunum 30% félagsmanna SFR. Fæðishlunnindi eru innifalin í heildarlaunum um 20% félagsmanna og um 20% fá fasta yfirvinnu (fyrir unna yfirvinnu). Aftur kemur fram munur eftir kyni en fleiri karlar (93%) en konur (81%) eru með aukagreiðslur sem innifaldar eru í heildarlaunum þeirra.

Hlunnindi
Meira en helmingur félagsmanna SFR fær einhver hlunnindi á sínum vinnustað. Langalgengast er að fá styrk til líkamsræktar en 39% fá slíkan styrk, 14% fá fræðslustyrk og um 11% GSM síma. Karlar eru mun líklegri en konur til að fá einhver hlunnindi, 63% samanborið við 52% kvenna.