Kannanir SFR

Niðurstöður úr könnuninni um valið á Stofnun ársins 2011 voru kynntar, föstudaginn 13. maí, en þetta er í sjötta sinn sem SFR stendur að vali á Stofnun ársins. Könnunin var gerð meðal félagsmanna SFR og annarra ríkisstarfsmanna  á starfsskilyrðum þeirra og líðan á vinnustað. Umfang könnunarinnar er umtalsvert stærra í ár en verið hefur þar sem starfsmannaskrifstofa fjármálaráðuneytisins er nú í samstarfi við félagið. Könnunin náði til 19 þúsund ríkisstarfsmanna og samtals til um 44 þúsund starfsmanna á almennum og opinberum vinnumarkaði, en SFR hefur verið í samstafi við VR um valið á Stofnun ársins og Fyrirtæki ársins um árabil.

Vinnumarkaðskannanir SFR er mikilvægt og öflugt vopn í baráttunni fyrir bættum kjörum og hefur SFR staðið fyrir vali á stofnun ársins síðastliðin fimm ár en launakönnun í fjögur ár. Mikilvægt er fyrir stéttarfélög að fylgjast með launaþróun og er launakönnun ein aðferð til þess. Þar sem um er að ræða sambærilega könnun og VR gerir þá gefst þarna tækifæri til að bera saman þróunina á almennum vinnumarkaði og hjá hinu opinbera.

Niðurstöður í vali SFR á Stofnun ársins eru kynntar í maí á hverju ári á netinu og í sérriti SFR.
Niðurstöður í launakönnun eru kynntar í september.

Í febrúar ár hvert er framkvæmd launakönnun SFR og samhliða er Stofnun ársins valin. Þetta er viðamesta könnun á vinnuumhverfi í íslenskum stofnunum. Niðurstöðurnar eru stjórnendum mikilvægur mælikvarði á það hvað vel er gert og hvað má betur fara og starfsmenn stofnana fá tækifæri til að segja stjórnendum hvað þeim finnst um vinnustaðinn. Upplýsingar úr launakönnun eru síðan öflugt tæki fyrir félagsmenn til að hafa sem viðmiðun í launaviðtölum.