Fréttir

Formaður og framkvæmdastjóri SFR hittu Jóhönnu Sigurðardóttur félagsmálaráðherra á dögunum og afhentu henni launakönnun sem SFR og VR stóðu að um leið og þeir kynntu niðurstöðu hennar. Var sérstaklega rætt um þann kynbundna launamun sem viðgengst hjá ríkinu og launamuninn sem er á milli starfsmanna ríkisins og starfsmanna á almenna markaðnum. SFR leggur mikla áherslu á að kynbundinn launamunur verði leiðréttur þegar í stað og að gripið verði til aðgerða til að vinna á honum. Ennfremur bendir SFR á að engar haldbærar skýringar eru fyrir hendi á þeim mikla launamun sem er á milli opinbera markaðarins og hins almenna og að þann launamun verði að jafna.

Vakin er athygli á að laust er í íbúðinni í Kaupmannahöfn og í orlofshúsum SFR nú í janúar. Áhugasamir setji sig í samband við skrifstofu SFR í síma 525-8340. Sá háttur er hafður á að fyrsta virka dag hvers mánaðar er farið að skrá pantanir fyrir næsta mánuð á eftir og að sjálfsögðu fyrir það sem enn er hugsanlega laust í nýbyrjuðum mánuði, nema íbúðin í Kaupmannahöfn sem ávallt er bókuð 4 mánuði í senn.

Í nýútkomnu tölublaði SFR blaðsins segir frá því að Svæðisskrifstofa málefna fatlaðra í Reykjavík hefur kynnt starfsmönnum nýtt fyrirkomulag um tilkynningu og skráningu veikinda. Fyrirkomulagið felur í sér að starfsmaður tilkynni veikindi til fyrirtækisins InPro sem heldur utan um veikindaskráningu fyrir Svæðisskrifstofuna. Jafnframt láti starfsmaður vita af veikindunum á vinnustað og gefi upp eðli veikinda. Þetta brölt hjá Svæðisskrifstofunni er með nokkrum ólíkindum þar sem stofnunin virðist ekki gera sér það ljóst að breytingar sem þessar getur stofnunin ekki gert. Fyrirkomulag tilkynninga um veikindi og skráning þeirra er vel skilgreint í kjarasamningi SFR og fjármálaráðuneytisins.

SFR - stéttarfélag hefur um árabil boðið félögum sínum upp á tvö sumarhús á Spáni yfir orlofstímann. Þessi sumarhús hafa nýst félögum okkar vel og verið mjög eftirsótt. Félagsmenn SFR hafa þó gegnum tíðina óskað eftir fleiri valkostum í sumarleyfisferðum erlendis. Nú verða breytingar á og er ánægjulegt að geta kynnt til sögunnar nýja möguleika, en félagið hefur ákveðið að bjóða félagsmönnum uppá að kaupa gjafabréf sem hægt er að nota sem greiðslu inná sumarleyfisferðir frá 1. maí til 15. sept. (upphafsdagur ferðar verður að vera innan þessa tímabils), hjá Sumarferðum, Plús ferðum og Úrval Útsýn.  Dagana 17., 18., 19., 20., og 21. des. nk. verður opið fyrir pantanir á orlofsgjafakortum HÉR á vefnum. Úthlutanir munu fara eftir punktastöðu félagsmanna í sólarlandapottinum...

Valdimar Leó Friðriksson, fyrrverandi ritari í stjórn SFR, hefur sagt sig úr stjórninni eftir tæplega 6 ára stjórnarsetu, en hann tók nýlega við starfi framkvæmdastjóra Landssambands slökkviliðs-og sjúkraflutningamanna.  Við starfi ritara tekur Guðlaug Þóra Marinósdóttir sem starfar hjá Matís ohf., en hún hefur verið í stjórn SFR í tæp 6 ár og einnig tekið virkan þátt í starfi ungra innan félagsins.