Fréttir

Stjórn styrktar- og sjúkrasjóðs hefur unnið að enduskoðun á úthlutunarreglum sjóðsins og taka nýjar reglur gildi frá og með 1. janúar 2005. Nýmæli í reglunum eru styrkir til tannviðgerða, ættleiðingar, glasafrjóvgunar, tæknisæðingar og kaupa á heyrnartækum. Þá hefur ákvæði um gleraugnastyrk verið breytt...

SFR – stéttarfélag í almannaþjónustu og Starfsmannafélag Reykjavíkurborgar héldu sameiginlegt jólaball þriðjudaginn 28. desember kl. 16 í Súlnasal Hótel Sögu. Hljómsveitin Mistilteinn sá um að halda uppi fjörinu með dansi í kringum jólatréð, söngi og skemmtilegum leikjum.

NSO samtök norrænna ríkisstarfsmanna munu halda ársþing sitt hér á landi næsta sumar.  Gert er ráð fyrir að um 50 fulltrúar aðildarfélaga NSO sæki fundinn sem verður á Akureyri dagana 19. til 22. júní.  Jens Andrésson formaður SFR er jafnframt formaður NSO og er ársþing samtakanna jafnan haldið í landi þess sem er í formennsku hverju sinni.

BSRB og Framvegis miðstöð um símenntun, undirrituðu samning um tungumálafræðslu BSRB, fimmtudaginn 9. desember, í BSRB-húsinu Grettisgötu 89. Hér er um að ræða afar metnaðarfullt átak í að efla tungumálakunnáttu félagsmanna í BSRB.  Boðið verður upp á námskeið í ensku, dönsku, spænsku, íslensku ritmáli, þýsku og frönsku...

Samfara auknum hagvexti hafa skuldir íslenska þjóðarbúsins farið stigvaxandi og virðist lítið lát vera á þeirri þróun. Nú er svo komið að Íslendingar skulda meira en flestar aðrar þjóðir í heiminum. Þegar litið er til iðnþróaðra ríkja eru aðeins Finnar og Nýsjálendingar skuldugri en Íslendingar.

Fræðslusetrið Starfsmennt býður upp á fjölbreytt námskeið á nýju ári. Eins og fyrr er um að ræða blöndu af almennum og sértækum námskeiðum, og leggur Starfsmennt áherslu á að bjóða upp á framúrskarandi efni og framsetningu á þeim.

Vinnueftirlitið kynnti nýja reglugerð, Aðgerðir gegn einelti á vinnustað, á morgunverðarfundi 8. desember sl. og tekur hún gildi 20. des. nk. eftir birtingu hennar í Stjórnartíðindum. Markmiðið með reglugerðinni er að innan vinnustaða verði stuðlað að forvörnum og aðgerðum gegn einelti á vinnustöðum.

Samninganefnd SFR kom með nýtt útspil í kjaraviðræðum við samninganefnd ríkisins á fundi sem haldin var í dag. Samninganefnd SFR lagði fram hugmynd að nýrri launatöflu þar sem gert er ráð fyrir að svokölluðum skilgreiningarömmum A,B,C og D verði fækkað úr fjórum í þrjá.

Umræður um launamál og samanburður á launum ríkisstarfsmanna annars vegar og launum á almenna markaðinum hins vegar er vinsælt umræðuefni þessa dagana. Þar er gjarnan staðhæft að ríkisstarfsmenn, faglærðir sem ófaglærðir, hafi fengið ríflegan skerf af hinu efnahagslega góðæri síðustu ára, umfram starfsmenn á almenna markaðinum.  Þessi söngur hefur hljómað bæði úr herbúðum...

“Eftir að hafa á nokkrum fundum farið yfir viðfangsefni nýs samnings og skipulagt fyrirkomulag viðræðna má segja að í gær hafi í raun verið fyrsti eiginlegi samningafundurinn við ríkið þar sem kröfur okkar voru til efnislegrar umræðu” segir Jens Andrésson formaður SFR eftir fund með samninganefnd ríkisins í gær þriðjudaginn 30. nóvember.

Á fundi trúnaðarmannaráðs SFR 24. nóvember var samþykkt eftirfarandi álytkun um skattalækkunaráform ríkisstjórnarinnar: “Trúnaðarmannaráð SFR hefur áhyggjur af þeim skattalækkunum sem nú hafa verið boðaðar, þar sem líkur eru á að með þeim hagnast hinir best settu mest, en hinir tekjulægstu minnst".

Nokkur afturkippur kom í viðræðum um sameiginlegar kröfur BSRB, BHM og KÍ þegar samninganefnd ríkisins dró tilbaka tillögur sem hún hafði gert um trúnaðarmenn sem samtökin höfðu metið sem gott innlegg í viðræðurnar. Að sögn Árna Stefáns Jónssonar, framkvæmdastjóra SFR, var lítið um haldbærar skýringar á þessum sinnaskiptum...

Undanfarið hefur starfsmannaskrifstofa fjármálaráðuneytisins unnið að endurskoðun á vefsíðum um starfsmannamál ríkisins og m.a. hefur efnisflokkunin tekið nokkrum breytingum.

Í dag, miðvikudaginn 17. nóvember, eru liðin 65 ár frá stofnun SFR. Starfsmannafélag ríkisstofnana eins og félagið hét í upphafi var stofnað í Alþýðuhúsinu í Reykjavík 1939.  Guðjón B. Baldvinsson var helsti hvatamaður að stofnun félagsins og var hann kjörinn fyrsti formaður...

Fyrsti fundur samninganefndar SFR og ríkisins um nýjan kjarasamning var haldinn síðast liðinn mánudag.  Á fundinum var kröfugerð SFR lögð formlega fram og gerð grein fyrir meginkröfum félagsins.....

Næsti trúnaðarmannaráðsfundur SFR verður haldinn klukkan 13,  miðvikudaginn 24. nóvember.  Reikna má með að þetta verði síðasti fundur ráðsins á þessu ári, nema til sérstakra tíðinda dragi sem trúnaðarmannaráðið þarf að fjalla um. 

Fyrsti fundur um nýjan kjarasamning starfsmanna fríhafnarinnar í Flugstöð Leifs Eiríkssonar hefur verið boðaður næstkomandi fimmtudag 18. nóvember. Núgildandi kjarasamningur rann út um síðustu mánaðamót og er vinnu við kröfugerð lokið og hefur verið fjallað um hana meðal starfsfólks flugstöðvarinnar.

12.11.2004
- Viðræðum um sameiginlegar kröfur að ljúka
Fyrsti samningafundur samninganefndar SFR og samninganefndar ríkisins um kröfur SFR hefur verið boðaður mánudaginn 15. nóvember. Undanfarið hafa verið haldnir 17 samningafundir um sameiginlegar kröfur BSRB, BHM og KÍ og standa vonir til að þeim viðræðum ljúki í næstu viku. Árni Stefán Jónsson framkvæmdastjóri SFR sem sæti á í samninganefndinni segir að í ljósi þess að nú sjái fyrir endann á þessum sameiginlegu viðræðum hafi verið ákveðið að óska eftir því að hefja strax viðræður um kröfur SFR. 

- Jens Andrésson formaður SFR segir frá nýafstaðinni ferð til Suður Kóreu
“Það var mjög sterk upplifun að koma til Suður Kóreu sem fulltrúi Norðurlandanna og fylgjast með baráttunni sem samtök opinberra starfsmanna eiga í þar í landi og hafa aðstöðu til að ræða milliliðalaust við fulltrúa stjórnvalda um ástandið og styðja með þeim hætti við bakið á félögum okkar” segir Jens Andrésson formaður SFR sem er nýkomin úr ferð til Seoul í Suður Kóreu en þar sótti hann málþing til stuðnings réttindabaráttu opinberra starfsmanna. Jens fór til Suður Kóreu sem formaður NSO, en það eru samtök norrænna ríkisstarfsmanna og með honum í för var alþjóðafulltrúi samtaka opinberra starfsmanna í Svíþjóð.

Þessa haustönn býður SFR félagsmönnum sínum upp á námskeið/fyrirlestra á Akureyri, Dalvík, Siglufirði, Borgarnesi, Selfossi, Ísafirði, Hólmavík, Neskaupstað og Eskifirði í samstarfi við símenntunarmiðstövar úti á landi. Enn eru laus pláss og hvetjum við félagsmenn til að kynna sér hvað er í boði.

Vinna við kröfugerð starfsmanna sem vinna hjá Fríhöfninni í Flugstöð Leifs Eiríkssonar er nú á lokastigi en núgildandi kjarasamningur rennur út þann 31. október næst komandi.  Gert er ráð fyrir að samningaviðræður hefjist mjög fljótlega...

Á mánudag og þriðjudag munu samninganefndir BSRB, BHM, KÍ og ríkisins hittast á vinnufundum þar sem farið verður yfir réttindamál aðildarfélaga BSRB sem samkomulag er um að taka fyrir á hinum sameiginlega vettvangi. „Við lítum svo á að með þessum vinnufundum sé að færast meiri þungi í viðræðurnar” segir Árni Stefán Jónsson framkvæmdastjóri SFR sem sæti á í samninganefndinni. 

Föstudaginn 29. október kl. 9.15 mun BSRB efna til fundar með framkvæmdastjóra og varaformanni EPSU, Evrópusambands starfsfólks í almannaþjónustu, þeim Carola Fischbach-Pyttel og Anne-Marie Perret. EPSU, Evrópusamband starfsfólks í almannaþjónustu, er málsvari 193 stéttarfélaga og sambanda í 33 löndum Evrópusambandsins og  Evrópska efnahagssvæðisins. EPSU kemur fram fyrir hönd starfsfólks í almannaþjónustu gagnvart valdastofnunum ESB.

Óútskýrður launamunur kynja er 17% meðal félaga í BSRB, BHM og KÍ. Þessar niðurstöður koma fram í könnun Hagrannsóknastofnunar samtaka launafólks í almannaþjónustus (HASLA) sem kynnt var í morgun. Um er að ræða 17% mun á heildarlaunum þegar borin eru saman karl og kona sem eru í fullu starfi, hafa sömu menntun, vinna sambærilegt starf og jafnlangan vinnutíma.

Fundur trúnaðarmannaráðs SFR, haldinn 14. október, sendir frá sér eftirfarandi ályktun:
Í kröfugerð heildarsamtaka opinberra starfsmanna, BSRB, BHM og KÍ, er krafa um styttingu vinnuvikunnar svo hún verði ekki lengri en almennt gerist í nágrannalöndum okkar.  Þetta ákvæði er einnig í kröfugerð SFR.  Trúnaðarmannaráð SFR undirstrikar mikilvægi málsins í komandi samningum og krefst þess að samið verði um styttingu vinnuvikunnar í þessum samningum.

15.10.2004
Nokkrir fundir hafa verið haldnir með samninganefnd ríkisins um réttindamál sem varða alla ríkisstarfsmenn BSRB, BHM og KÍ. Á þessum fyrstu fundum hafa réttindamál trúnaðarmanna tekið mestan tíman og tryggingamál. Samkvæmt viðræðuáætlun áttu þessar viðræður að standa fram til 15. október. Nokkuð ljóst er að  meiri tíma þarf...

Fundur trúnaðarmannaráð SFR, haldinn 14. október, sendir frá sér eftirfarandi ályktun:
Sterk hreyfing launþega og öflug samtök atvinnulífs eru hornsteinar á íslenskum vinnumarkaði. Nú ber svo við að forsvarsmenn útgerðarfélagsins Brims á Akureyri þjösnast fram og sniðganga lög og leikreglur vinnumarkaðarins. Slíkt er aðför að samningsrétti stéttarfélaga og til þess fallið að grafa undan verkalýðshreyfingunni og réttindabaráttu launafólks almennt.

Jafnréttisráð stendur fyrir málþingi um jafnréttisáætlanir á Grand - Hótel 26. október nk. Fjallað verður um gildi jafnréttislaga, jafréttisáætlanir, fyrirtæki og jafnrétti, jafnréttisstefnu Reykjavíkur-borgar o.fl.

Ályktun til stuðnings
grunnskólakennurum.

Formannafundur NSO (Nordiske Statstjenestemenns Organisasjon) var haldinn í Osló dagana 28. – 29. september sl., en SFR er í forsvari fyrir samtökin starfsárið 2004-2005. Á fundinum var fjallað um réttindabaráttu ríkisstarfsmanna í Suður-Kóreu sem NSO hefur stutt við bakið á. Einnig var tekin ákvörðun um að þema ráðstefnun NSO, sem haldin verður næstkomandi sumar á Akureyri, yrði ungt fólk til starfa hjá ríkinu.

Samningaviðræður BSRB,BHM og KÍ við ríkið um réttindamál eru hafnar. Samtökin leggja áherslu á að bæta stöðu trúnaðarmanna, tryggingar, bættan veikindarétt, eflingu styrktarsjóða, lífeyrisréttindi, rétt tímavinnufólks, lengingu uppsagnarfrests, vinnuumhverfismál og starfsmannastefnu.

Gott að vita námskeið haustsins munu innihalda fjölbreytta blöndu af klassískri og nýrri fræðslu þar sem allir ættu að finna eitthvað við sitt hæfi. Dæmi um slík námskeið eru Heimilisbókhald, Vídeóupptökur og Breytingar sem tækifæri.

Á fundi trúnaðarmannaráðs SFR, 8. sept. sl., var kröfugerð félagsins fyrir komandi kjarasamninga samþykkt einróma, en kjarasamningar eru lausir frá og með 1. desember nk. Megináherslan er á 150.000 kr. lágmarkslaun og fjölskylduvæna kjarasamninga sem birtist í kröfu um styttingu vinnuvikunnar, aukinn rétt vegna veikinda barna o.fl. Einnig er lögð sérstök áhersla á að launamismunur kvenna og karla verði leiðréttur.

Fréttatilkynning
Fundur trúnaðarmannaráðs SFR, sem haldinn verður 8. september nk., mun taka til afgreiðslu kröfugerð félagsins vegna komandi kjarasamninga, en þeir eru lausir frá og með 1. desember nk.

Námsstefna verður haldin í Kennnaraháskólanum við Stakkahlíð föstudaginn 17. september kl. 9-15. Hún er haldin á vegum Stígamóta, Kvennaathvarfsins, Neyðarmóttöku vegna nauðgana, Kvenfélagasambands Íslands, Kvennaráðgjafarinnar, Kvenréttindafélagsins og Öryggisráðs Feministafélags Íslands. Markmiðið með verkefninu er að hreyfa við menntakerfinu með jákvæðum hætti og auka vitundina um umfang kynbundins ofbeldis og þá ábyrgð sem á fagfólki hvílir að bregðast rétt við. 

Á fundi launamálaráðs í sumarbyrjun var kosið í samninganefnd félagsins.  Hún samanstendur af 13 einstaklingum og koma þeir úr mörgum öngum félagsins.  Nefndin er hæfilega skipuð af miklu reynsluboltum sem og nýju fólki. Nefndin kom fyrst saman í byrjun júní og ræddi verkefnin sem eru framundan.  Nú í lok ágúst fór nefndin í tveggja daga vinnuferð á Hótel Heklu á Skeiðum, þar sem hópurinn kynntist innbyrðis og fór ítarlega yfir drög að kröfugerð félagsins fyrir komandi kjarasamninga. 

Vika símenntunar verður haldin dagana 12.-18. september en hún er nú haldin í fimmta sinn hér á landi. Vika símenntunar er á vegum menntamálaráðuneytisins en Mennt - samstarfsvettvangur atvinnulífs og skóla sér um skipulagningu og framkvæmd hennar í samvinnu við símenntunarmiðstöðvarnar níu á landsbyggðinni. Um er að ræða kynningarátak þar sem athyglinni er að þessu sinni beint að ungu fólki undir slagorðinu EKKI BARA HUGSA UM ÞAÐ!

Verkaskipting ríkis og sveitarfélaga á Norðurlöndum var meðal umræðuefna á árlegri ráðstefna NSO (Nordiske Statstjenestemenns Organisasjon) sem var haldin í Ouluborg í Finnlandi 11. – 14. ágúst sl. Að þessu sinni var hún haldin í samvinnu við norræn samtök starfsmanna sveitarfélaganna, NTR (Nordisk Tjenestemannsråd).

Mánudaginn 12. júlí sl. birti Félagsdómur úrskurð sinn í máli SFR gegn ríkinu og Eflingu, og dæmdi SFR í vil.  Fallist var á allar kröfur SFR.

ALLIR Á VÖLLINN! SÝNUM ÞEIM RAUÐA SPJALDIÐ!

Fjöldafundur á Austurvelli miðvikudaginn 19. maí kl. 12:10.  Hingað og ekki lengra!
Lýðræði byggist á umræðum, gagnsæi, ábyrgð, virðingu og trausti. Íslensk stjórnvöld sniðganga lýðræðislega umræðu í hverju málinu á fætur öðru og beita handafli til að koma fram málum. Írak, útlendingalög, umhverfismál, öryrkjar, réttindi launafólks, Hæstiréttur, Umboðsmaður Alþingis, kærunefnd jafnréttismála, og nú síðast fjölmiðlar. Nú er mælirinn meira en fullur. Leikreglur lýðræðisins eru ekki virtar.

Félagsmönnum stendur til boða að kaupa miða í Hvalfjarðargöngin á 700 kr. aðra leiðina, eða 1.400 kr. fram og til baka.
Eins og undanfarin sumur þá verða miðar á Hótel Eddu til sölu á skrifstofu SFR frá og með 1. júní nk. Þá býðst félagsmönnum í fyrsta sinn að kaupa gistimiða sem gilda á öllum Fosshótelunum, sem eru alls 13 á landinu.  Um takmarkað magn gistimiða verður að ræða og getur hver félagsmaður mest fengið 7 miða. 

1. maí, alþjóðlegur frídagur verkalýðsins er á næsta leyti. Saga dagsins á sér langa ögu en hátíðarhöldin spruttu upp úr baráttu verkafólks í Bandaríkjunum fyrir átta stunda vinnudegi árið 1886. SFR hvetur alla félagsmenn til að taka þátt í hátíðarhöldum en dagskrá dagsins er full af áhugaverðum erindum og atriðum og vonast félagið til að sem flestir sjái sér fært að mæta. Dagskrá dagsins má finna hér.

Næsti trúnaðarmannaráðsfundur SFR verður haldinn í húsakynnum félagsins að Grettisgötu 89, miðvikudaginn 14. janúar næstkomandi kl. 13:00. Í ljósi frétta og umræðna í samfélaginu þessa dagana varðandi fyrirhugaðar uppsagnir fjölda fólks á Landspítalanum mun Magnús Pétursson, forstjóri LSH koma og flytja erindi. Málefni tengd innra starfi félagsins verða einnig í hávegum höfð og mun til dæmis eiga sér stað undirbúningur fyrir aðalfund félagsins sem haldinn verður 27. mars næstkomandi. Einnig mun kosning launamálaráðs eiga sér stað á fundinum.

Við hvetjum alla til að mæta og hlýpa á athyglisverð erindi og taka þátt í umræðum þeim tengdum.